Boks dhe UFC përpara futbollit, kjo është zgjedhja e Cristiano Ronaldos. E çuditshme ndoshta, por e vërtetë. Ylli portugez i futbollit është parë të mbështesë boksierë të ndryshëm, apo një luftëtar të MMA si Khabib Nurmagomedov. Së fundmi ai ka dhënë një intervistë për DAZN dhe flet për shanset e tij që të ishte bërë boksier.
“Futbolli është pasioni im dhe më pëlqen të shoh sporte të tjera në TV. Midis një ndeshjeje futbolli dhe një ndeshjeje boksi ose në UFC, preferoj këto dy të fundit. Nuk mendoj se kam pasur shanse të isha boksier, është e vështirë.
Duhet të lindësh për diçka të tillë, me ato dhunti. Mendoj se kam lindur të jem një futbollist profesionist. Që në fillimin mendova se e kisha dhuntinë dhe thashë ta shfrytëzoja atë mundësinë. Boksi është pak më i vështirë, pasi je vetëm kur garon.
Ju punoni në palestër, keni ekipin tuaj por nuk luajnë me ju. Ata vetëm stërviten me ju. Në rastin tonë është ndryshe, është më argëtuese, sepse punojmë, qeshim së bashku dhe është një lloj tjetër sakrifice.
Kur isha te Manchester United, një trajner e praktikoi me mua boksin. Mendoj se stërvitja e boksit është e mirë për futbollin, sepse të përmirëson shqisat dhe lëvizjet”, është shprehur sulmuesi portugez i Juventusit, Cristiano Ronaldo.
