Kryeministri Edi Rama, gjatë konferencës për mediat, u pyet sot lidhur me vizitën në New York, për të cilën e njoftoi në rrjetet sociale si një takim sy në sy me prodhuesit e vaksinave.
Në fakt Rama u fotografua në dyqane të ndryshme në New York, dhe më pas publikoi një foto me CEO e kompanisë Pfizer, por nuk dha ndonjë shpresë se ka siguruar dozat e nevojshme të vaksinave për shqiptarët. Udhëtimin 3 ditë para takimit në New York, Rama e argumentoi se faktin se duhej të karantinohej për 3 ditë në bazë të rregullave, megjithëse më pas e kishin lejuar të dilte, duke bërë një përjashtim, mesa duket për të.
“Për pazarin tim meqë më keni parë duke bërë pazar në Amerikë.
Kemi shkuar në Nju Jork 3 ditë para takimit se rregulli i shtetit të Nju Jorkur është karantinim 3 ditë para se të dalësh e të bësh ça ke për të bërë.
Shkova tre ditë para, me mirëkuptimin e tyre nuk ishim komplet të burgosur, por s’më keni parë as te Guçi as te Çuçi, kam bërë foto në një dyqan bojërash kancelarie, edhe sikur te isha në dyqan tjetër nuk do ishte ndonjë krim”, tha ai.
