Qeveria miratoi dje një ndihmë financiare për familjen Rasha, ndërsa 25-vjeçari Klodian Rasha, u vra nga një efektiv i forcave Shqiponja.
Në vendim tërhoqi vëmendjen përcaktimi i vrasjes si aksidentale, ndërsa familjarët e viktimës e konsideruan këtë si një “vrasje për herë të dytë të 25-vjeçarit”.
Sot në një konferencë për mediat, Rama ka sqaruar sepse u quajt në vendim vrasja si aksidentale, ndërsa nuk kurseu akuzat ndaj cilitdo që iu referua termit të përdorur.
Kreu i qeverisë tha se termi aksidentale është përdorur për të përcaktuar arsyen e dhënies së pensionit. Ai tha gjithashtu se ky nuk është rasti dhe për të mos marrë përsipër për të bërë gjykatën por thjesht për të dhënë atë kontribut që është shprehje e solidaritetit me familjen.
“Kjo është një nga çorbat që keni bërë ju. Një çorbë që ka trazuar shpirtrat e njerëzve për shkak të një ose qëllimit të keq, ose padijes. Pikërisht se qeveria nuk është gjykatë dhe nuk mund të marrë përsipër të bëjë rolin e gjykatës është përdorur thjesht dhe vetëm një term juridik, teknik për të përcaktuar arsyen e dhënies së pensionit. Dhe është thënë aksidentalisht nga veprimi i forcave policore.
Kjo do të thotë që personi që humbi jetën tragjikisht nuk ka qenë objekt i ndonjë misioni policor. Por ka humbur jetën në kushte të një përplasje aksidentale. Kjo nuk përcakton që personi është vrarë me një plumb që ka ardhur nga qielli, por përcakton që humbja e jetës është rezultat i një përplasje aksidentale, pastaj në këtë që nuk ka qenë pjesë e ndonjë operacioni, zinxhir komande, pasi ka raste ku policia vendos që një person i rrezikshëm duhet asgjësuar.
Ky nuk është rasti dhe për të mos marrë përsipër për të bërë gjykatën por thjesht për të dhënë atë kontribut që është shprehje e solidaritetit me familjen. Kjo nuk ka lidhje me aksidentin në kuptimin e vendosjes së një fjale përfundimtare mbi cështjen gjyqësore që është në vete. Po të ishte aksident, po të kishte humbur jetën se i erdhi një plumb rikoshet që i erdhi aty pranë, nuk do të merrte pension”, tha ai.
Në fakt edhe me vendimin e marrë duke i lidhur një pension familjes Rasha, duket se Edi Rama, sërisht ka gabuar, pasi familjarët mund t´i drejtohen Gjykatës për të kërkuar dëmshpërblim nga shteti, përderisa autori i vrasjes është një punonjës i Policisë së Shtetit. Dhe masën e dëmshpërblimit, nëse do të kërkohet në Gjykatë, nuk e përcakton as Kryeministri dhe as Qeveria me një vendim apo Akt Normativ, por gjykata.
