Jeta e një njeriu në Shqipëri është e barazvlefshme me një rrogë minimale, të paktën kaq llogaritet me kutin e rilindjes.
Vrasja dhe ‘JO’ vdekja e Klodian Rashës nga Policia e Shtetit, ka ngritur prej 1 jave të madhe e të vogël në Shqipëri, të cilët po protestojnë në çdo cep të vendit.
Por për rilindjen e Edi Ramës dhe shputën e tij vrastere, jeta e një njeriu në Shqipëri nuk ka vlerë, pasi në vendimin e fundit për të ndihmuar familjen Rasha me disa të holla, shkruhet e bardha në të zezë që ngjarja e rëndë ishte aksidentale.
Ndërsa shqiptarët po protestojnë me të gjitha mënyrat për të vënë drejtësi, Rama me shkopin e tij magjik mendon se duke dhënë një shumë financiare, do të kalojë faktin se një njeri u ekzekutua nga një njeri me e uniformë.
Ndërkohë që në Shqipëri është ngritur i madh e i vogël dhe po kërkojnë për Klodianin e jo vetëm dënimin e autorit që shkrepi armën, por dhe shkarkimin me urgjencë të njeriut që ‘urdhëron’ çdo lëvizje në Policinë e Shtetit, Rama gjen kohë të bëjë pazare të fëlliqura me jetë njerëzish, ashtu siç edhe ka bërë në këto 8 vite.
Ende pa folur drejtësia Rama edhe këtë herë ka zgjedhur të japë versionin e tij final, duk e quajtur AKSIDENTALE vrasjen e Klodian Rashës….
‘Këta të vrasin natën dhe të qajnë ditën’ është fiks shprehja që i shkon për shtat vendimit të fundit të marrë nga rilindasit dhe kryekreu i tyre Edi Rama.
‘Kjo që më ndodhi mua mos i ndodhtë askujt, duam drejtësi’, kështu do të shprehej babai i Klodianit të ndjerë vetëm pak orë pasi i biri u ekzekutua nga vetë shteti me uniformë nëpër rrugicat e errëta të Tiranës, vetëm pse nuk kishte vënë maskën.
E ndërsa shqiptarët në shenjë solidariteti u ngritën në këmbë me protesta dhe e kuptuan drejt thirrjen e familjes Rasha, Rama zgjodhi që edhe këtë herë të zgjidhë gjithçka me para, ashtu siç ka bërë për të mbajtur pushtetin, apo edhe siç po bën në tentativën e radhës për të fituar sërish zgjedhjet.
Kjo pra është Shqipëria ku sot jetojmë, ku të rinjtë që ngrihen në protesta cilësohen si terroristë të ‘Boko Haramit’ e ata që vriten nga shteti mund të ‘blihen’ me para…..
Taulant Halili/ Boldnews.al
