Teksa këtë të Hënë pritet të zhvillohet disa e 6 e protestës pas vrasjes së Klodian Rashës nga një efektiv policia, Polica e Shtetit paralajmëron se nuk do ta lejojë.
Në një njoftim zyrtar, Policia e Shtetit shprehet se, në zbatim të Aktit Normativ me qëllim respektimin e masave kundër COVID-it, kërkohet zbatimi i masave dhe i protokolleve të miratuara nga Komiteti i Ekspertëve dhe urdhrat e Ministrisë së Shëndetësisë dhe Mbrojtjes Sociale.
Policia shton se është shumë e vetëdijshme për të drejtën e protestës dhe lirinë e pacenueshme të tubimit. “Në kushtet e sensibilizimit të madh të shoqërisë pas tragjedisë së djalit njëzetepesë vjeçar që humbi fatalisht jetën, nga dora e një efektivi policie, Policia e Shtetit e ka pasur të pamundur ta anashkalojë ndjeshmërinë popullore për të mos lejuar asnjë tubim. Por tanimë kur drejtësia po kryen detyrën e saj ndaj autorit të vrasjes dhe kur protestat kanë degraduar në organizime që kanë për qëllim cenimin e rendit publik dhe pronës publike, Policia e Shtetit nuk do të tolerojë asnjë grumbullim që bie ndesh me kornizën aktuale të masave shtrënguese”, thuhet në njoftimin e policisë.
Sipas masave në fuqi, nuk lejohet grumbullimi i me më shumë se 10 personave.
