Ish-deputeti Genc Pollo ka reaguar përmes një postimi në rrjetet sociale lidhur me dhunën policore ndaj protestuesve në Tiranë dhe qytete të tjera të vendit. Ish-deputeti propozon që opozita të angazhohet për një komision hetimor qeveritar pas 25 prillit, i cili do të hetojë të gjithë shkelësit e ligjit në rradhët e policisë, në mënyrë që ata të përballen me drejtësinë
Pollo thekson se dhuna antiligjore e policisë së qeverisë rilindiste po vazhdon, edhe ndaj protestës paqësore ku mungojnë vandalizmat anësore siç e pamë dje, edhe ndaj të miturve siç e kemi parë gjithë këto ditë.
“Që t’a dinë mirë që sot se paligjshmëria do të ndëshkohet, opozita të angazhohet për një komision hetimor qeveritar mbas 25 prillit, i cili, bazuar në raportet e Avokatit të Popullit, shoqatave për te drejtat e njeriut, medias etj., të hetojë e të gjejë shkelësit në rradhët e policisë e t’ja dorëzojë Drejtësisë”, shkruan Pollo.
Reagimi i ish-deputetit vjen në një kohë, kur mediat, Avokati i Popullit dhe shoqata të ndryshme që mbrojnë të drejtat e njeriut, kanë evidentuar raste të dhunës policore ndaj protestuesve, shoqërimet dhunshëm në komisariate të të miturve, keqtrajtimeve në ambientet e komisariateve të të ndaluarve, por edhe moslejimin e kontakteve të tyre me avokatë mbrojtës apo familjarë.
