Organizata Botërore e Shëndetësisë paralajmëroi se festimet e Krishtlindjes mund të shndërrohen në zi, nëse njerëzit do të dështojnë në respektimin e masave anti-Covid gjatë sezonit festiv.
Shefi i OBSH-së tha se numri i viktimave të pandemisë së koronavirusit po rritet dhe i kërkoi njerëzve të mendohen mirë për planet e tyre festive.
“Sezoni festiv është një kohë për t’u çlodhur dhe festuar por festimet mund të kthehen shpejt në trishtim, nëse ne dështojmë të marrim masat e nevojshme.
Ndërsa ju përgatiteni të festoni, në javët e ardhshme, ju lutem merrni masat për të mbajtur veten dhe të tjerët, të sigurt. Kjo mund të jetë dhurata më e mirë që mund të bëni, një dhuratë shëndeti…”, u shpreh shefi i OBSH-së.
Shefi i OBSH-së tha se ka patur një rritje me 60 përqind të viktimave në shkallë globale gjatë gjashtë javëve të shkuara.