Këngëtarja me origjnë shqiptare Dua Lipa ka pranuar virtualisht çmimin në “Billboard Women in Music” nga një prej heronjve të saj, politikani amerikan Bernie Sanders.
Interpretuesja e këngës “The New Rules” e hapi mbrëmjen gala të së enjtes vonë, me një perfomancë mbresëlënëse të “Boys Will Be Boys”, para se ta pranonte zyrtarisht çmimin “Women in Music Powerhouse”, i cili u jepet çdo vit atyre që e kanë dominuar skenën muzikore me shpërndarje të këngëve, shitje të albumeve dhe transmetime në radio.
Senatori Sanders e cilësoi Lipën si një këngëtare që lufton për të rinjtë, gratë, refugjatët dhe komunitetin LGBT.
“Ajo po e përdor platformën e saj për t’i sjellë njerëzit kah procesi demokratik. Po e ngre zërin për të kërkuar ndryshime të vërteta”, ka thënë Sanders.
“Jemi ende shumë larg për ta arritur barazinë e vërtetë. Le të vazhdojmë të festojmë për gratë dhe le të vazhdojmë t’i trimërojmë të gjitha vajzat e reja, në mënyrë që të jenë fuqitë e së ardhmes”, tha Dua Lipa.
