Pas Ambasadë amerikane në Tiranë, lidhur me vrasjen e 25-vjeçarit Klodian Rasha nga një efektiv policie, kanë reaguar edhe Delegacioni i BE-së, Misioni i OSBE dhe ambasadori gjerman në Tiranë, Peter Zingraf.
Në të gjitha deklaratat dhe reagimet ndërkombëtare, vrasja e të riut cilvsohet si vdekje, ndërsa i kërkohet autoriteteve që të hetojnë ngjarjen tragjike.
Nëpërmjet një postimi në “Twitter”, Ambasadori Luigi Soreca shpreh ngushëllimet për familjen e viktimës, ndërsa shton se ngjarja tragjike duhet të hetohet dhe se duhet të vendoset drejtësia.
“Shumë i pikëlluar nga ngjarjet e ditëve të fundit. Mendimet e mia janë me familjen e Klodian Rashës. Tani është thelbësore që kjo ngjarje tragjike të hetohet si duhet dhe të vendoset drejtësia, dhe shqetësimet e shprehura paqësisht të dëgjohen. Por dhuna duhet të shmanget në çdo rast, nga të gjitha palët”, shprehet Soreca.
Ambasadori gjerman, Peter Zingraf, thekson në reagimin e tij se “ngjarjet e ditëve të fundit më mbushin me shqetësim dhe trishtim. Vdekja e të riut më ka prekur edhe mua shumë”.
“Është e rëndësishme dhe e drejtë, që kjo ngjarje të zbardhet plotësisht. Mendimet e mia janë pranë familjes së viktimës. Por ajo çka na mëson gjithashtu ky rast tragjik është – dhuna nuk mund të jetë zgjidhja. Ushtrimi i lirë i të drejtës për protesta është thelbësor për çdo demokraci.
Por, edhe kur bëhet fjalë për gjëra shumë emocionale dhe elementare: vetëm protestat paqësore legjitimohen si demokratike. Unë i bëj thirrje të gjitha palëve, të heqin dorë nga dhuna”, deklaron ambasadori gjermane Peter Zingraf.
Ndërsa OSBE kërkon shmangien e dhunës në protestë.
“Ligjshmëria dhe rendi publik janë në themel të demokracisë dhe shtetit të së drejtës. Prezenca e OSBE-së në Shqipëri shpreh keqardhjen e saj të thellë për vdekjen e Klodian Rashës dhe besimin se ajo do hetohet si duhet. Mendimet dhe lutjet tona janë për familjen e tij. Tani, ne bëjmë thirrje për përmbajtje nga çdo lloj dhune dhe që të lejohet ligji të veprojë”, thuhet në reagimin e OSBE-së.
