Imunologu i njohur, Genc Sulçebe, u shpreh se vendet aziatike patën sukses në përballimin e pandemisë së Covid-19 pasi morën masa izoluese të shpejta.
Sulçebe tha se OBSH deklaroi që në fillim “testo, testo, testo” pasi sot pandemitë nuk menaxhohen si para 100 apo 200 vitesh me teoritë distancim fizik deri sa të zhduket pandemia, por përmes teknologjive, dhe një nga armët që kemi është testimi.
Imunologu i njohur tha se ajo që nuk eci siç duhet në Shqipëri ishte pikërisht testimi dhe më pas gjurmimi i rasteve.
“Testo, gjurmo, trajto, janë 3 komponentët në luftën ndaj një pandemie”, tha Sulçebe.
Mjeku i njohur vuri theksin në gabimin që u bë duke dhënë me koncesion laboratorin e testimeve molekulare.
Në studion e emisionit “5pyetje nga Babaramo”, Sulçebe tha se sistemi shëndetësor duhej të ishte përfshirë i gjithi.
“Mjekët e familjes duhej të ishin mobilizuar shumë herët, nuk mund të trajtohen pacientët me celularë, duhej një ndjekje kapilare e problematikës.
Spitalet rajonale, që kanë sektorët e tyre të sëmundjeve infektive, duhej të ishin të angazhuar. Kjo është një sëmundje që nuk kërkon ndonjë trajtim të specializuar, kjo do të një trajtim të kujdeshëm”, tha Sulçebe.
Ai tha se vaksina është parandalimi më i mirë i infeksionit.
“Sa më shpejt të vihet në funksion vaksina, aq më shpejt do të fiket pandemia. Vaksina është një material biologjik në formën e një virusi të çaktivizuar, që nuk kanë asnjë pasojë në organizëm”, tha Sulçebe.
Lidhur me lock down, imunologu i njohur tha se mbyllja është një opsion, por shoqëria është e lodhur nga aplikime të tilla që kanë pasoja sociale, ekonomike etj.
“Zgjidhja përfundimtare është aplikimi sa më i shpejtë i vaksinës, kjo po ndodh në Britaninë e Madhe, në Kinë apo Rusi”, tha ai.
