Gjyqtarët në SHBA hodhën poshtë të hënën paditë e ngritura nga një aleate e Presidentit Donald Trump për të anuluar çertifikimin e fitores së Presidentit të zgjedhur Joe Biden në shtetet Miçigan dhe Xhorxhia dhe për të shpallur zotin Trump fitues në të dy shtetet.
Të dy proceset gjyqësore u paraqitën më 25 nëntor nga Sidney Powell, ish-avokate e fushatës së Presidentit Trump, në emër të grupeve të votuesve republikanë. Presidenti Trump dhe aleatët e tij kanë humbur padi të shumta gjyqësore që synonin përmbysjen e rezultateve të zgjedhjeve të 3 nëntorit në shtetet ku ai humbi, duke ngritur pretendime të pabazuara për mashtrim.
Gjyqtarja e Qarkut Linda Parker në Detroit dhe gjyqtari i Qarkut Timothy Batten në Atlanta thanë se paditësit nuk kishin bazë ligjore për të ngritur padi dhe se çështjet ishin ngritur me shumë vonesë.
“Populli foli,” shkroi gjyqtarja Parker, duke iu referuar rezultateve të zgjedhjeve.
Ndërsa gjyqtari Batten tha një seancë të hënën se paditësit po kërkonin “ndoshta vendimin më të jashtëzakonshëm të kërkuar ndonjëherë” në lidhje me një zgjedhje.
“Ata duan që kjo gjykatë të zëvendësojë gjykimin e saj me atë të dy milionë e gjysmë votuesve të Xhorxhias që votuan për Joe Bidenin dhe unë nuk kam ndërmend ta bëj,” tha ai.
Zoti Biden e fitoi Miçiganin me rreth 154,000 vota popullore më shumë dhe Xhorxhian me rreth 12,000 vota më shumë, duke siguruar 16 vota elektorale nga secili shtet. Zoti Biden grumbulloi gjithsej 306 vota elektorale ndaj 232 të marra nga Presidenti Trump në Kolegjin Zgjedhor, i cili përcakton fituesin e zgjedhjeve presidenciale. Kolegji Zgjedhor mblidhet në 14 Dhjetor për të hedhur zyrtarisht votat.
Presidenti Trump, i cili pretendon në mënyrë të pabazuar se i fitoi zgjedhjet ka ndërmarrë një betejë të pasuksesshme ligjore për të zhbërë rezultatet e zgjedhjeve. Gjyqtarët gjithashtu kanë hedhur poshtë çështjet gjyqësore në Arizona, Pensilvani, Nevada dhe Uiskonsin.
“Ky proces gjyqësor duket se ka të bëjë më pak me ndihmën që kërkojnë paditësit – pasi kjo ndihmë është përtej fuqisë së kësaj gjykate – dhe më tepër me një përpjekje që pretendimet e tyre të ndikojnë tek besimi i njerëzve ndaj procesit demokratik, tek besimi i tyre ndaj qeverisë sonë,” shtoi gjyqtari.
Demokratët dhe të tjerë e kanë akuzuar Presidentin Trump se po përpiqet të dëmtojë besimin e publikut tek integriteti i zgjedhjeve amerikane dhe të minojë demokracinë. Një shumicë republikanësh në sondazhet e fundit kanë thënë se ata besojnë që zoti Trump i fitoi zgjedhjet dhe se ato u vodhën përmes mashtrimit të votuesve. Zyrtarët shtetërorë të zgjedhjeve kanë thënë se nuk ka prova për një mashtrim të tillë.
E marta është afati që shtetet të zgjidhin mosmarrëveshjet për zgjedhjet. Sipas ligjit amerikan, Kongresi e quan rezultatin e zgjedhjeve në një shtet “përfundimtar” nëse ai finalizohet deri në atë datë.
