Bota ka përjetuar nëntorin më të ngrohtë të regjistruar ndonjëherë, ndërsa Europa shënoi vlerat më të larta të stinës së vjeshtës.
Temperaturat kanë qenë më të larta në Europën Veriore, Siberi dhe oqeanin Arktik, ku niveli i akullnajave aktualisht është ndër më të ulëtat. Globalisht, nëntori ishte gati 0.8 ͦ C mbi mesataren e 1981-2010, dhe 0.1 ͦ C më i lartë se vitin e kaluar. Dhe kjo nxehtësi e pazakontë vjen pavarësisht nga efekti ftohës i La Niña.
Carlo Buontempo, drejtor i Shërbimit të Ndryshimit të Klimës KoperniKus, deklaroi se ky muaj ishte jashtëzakonisht i ngrohtë dhe se niveli i akujve po përjeton një rënie drastike.
Buontempo tha se politikëbërësit që i japin përparësi zbutjes së rreziqeve klimatike duhet t’i shohin këto regjistrime si këmbana alarmi dhe të mendojnë më seriozisht dhe më mirë mbi Marrëveshjen e Parisit 2015.
Shtetet e Bashkuara u tërhoqën nga marrëveshja e Parisit muajin e kaluar, me presidentin Donald Trump duke pretenduar se ai ishte krijuar për të vrarë ekonominë amerikane, por presidenti i zgjedhur Joe Biden ka premtuar të rikthejë paktin pasi të vijë në detyrë.
Të dhënat e Kopernikut tregojnë se 2020 mund të jetë viti më i nxehtë i regjistruar ndonjëherë. Raporti vjetor i klimës i Organizatës Botërore Meteorologjike (ËMO) javën e kaluar tha se 2020 do të ishte një nga tre vitet më të ngrohta të regjistruara, menjëherë pas 2016 dhe 2019.
Ndërsa të dhënat e dhjetorit do të jenë vendimtare, është pothuajse e sigurt që 2020 do të jetë viti kalendarik më i ngrohtë për Europën, raporton KoperniKus. Periudha janar-nëntor ishte 0.5 gradë celsius më e ngrohtë se ajo periudhë në 2019, viti më i ngrohtë i regjistruar ndonjëherë. /CNN
