Çdo ditë jepet pamjet nga spitalet Covid, atje ku prej muajsh trajtohen pacientët e prekur nga koronavirusi që kanë nevojë për trajtim spitalor.
E ndërsa një ditë më parë u raportuan autoambulancat që prisnin në rradhë në Covid2 ose “Shefqet Ndroqi”, sot një tjetër pamje e trishtë vjen nga spitalet.
Të afërmit presin me ankth përpara spitaleve për të mësuar diçka më shumë për njerëzit e tyre.
Ata sjellin me vete edhe ushqime e pije për ata që janë brenda. Një infermier i merr ato dhe ua shpërndan, siç tregojnë këto foto të LSA.
Një ditë më parë, ministrja Ogerta Manastirliu u shfaq pranë Infektivit, për të paraqitur mënyrën e re të komunikimit mes të afërmve dhe pacientëve, pas shqetësimeve të shumta se të sëmurët në spitale nuk mund të komunikonin me telefonat celularë.
Ndonëse ky është një problem më vete, duket i fundit përballë problemeve që kanë sot spitalet Covid, që nisin me mungesën e shtretërve, mbingarkesën e pacientëve që trajtohen, apo edhe mungesa të tjera, për të cilat flasin më mirë qeset apo çantat që dërgohen në spital nga të afërmit e pacientëve.
