I riu shqiptar që vrau dhe dogji pronarin e hotelit në Santorini për shkak se nuk i dha 200 euro të punës që kishte bërë është shprehur përmes avokatit të tij se nuk kishte qëllim që t’i merrte jetën dhe se gjithçka ishte “aksident”.
“Ishte një aksident”! Kështu u shpreh avokati i shqiptarit, Apostolos Lytras. “Klienti im nuk donte të vriste fatkeqin Nikos Halaris, ajo që ndodhi ishte një aksident pas grindjes mes tyre duke përfunduar në mënyrë tragjike” tha ai.
Në vijim të ndryshimit të linjës së qëndrimit, avokati i 20-vjeçarit shqiptar tha se “Ai e njihte hotelierin dhe klienti im shkoi ta takonte për t’i kërkuar diçka, para që i detyrohej. Sidoqoftë, sipas tij, viktima e ofendoi, e kërcënoi dhe e sulmoi me një shishe.
Në përpjekje për të shmangur goditjet, klienti im e shtyu viktimën. Pastaj ai humbi ekuilibrin dhe ra me pjesën e pasme të kokës. 20-vjeçari e kuptoi që 69-vjeçari kishte humbur jetën nga rënia dhe e kapi paniku dhe ajo që pasoi, sipas tij, ishte për shkak të terrorit dhe panikut të tij” tha avokati.
Ndërkohë që dje, Lefteris Gavrilis, avokati i familjes së viktimës, hotelierit Nikos Halaris ngriti dyshime mbi mënyrën e vrasjes dhe motivin. I riu ishte kthyer tre herë nga autoritetet greke, pasi e kishin kapur pa letra, por ai ishte rikthyer sërish për të punuar për të ndihmuar nënën dhe motrën në Shqipëri, pasi i ati i kishte vdekur disa kohë më parë.
