Teoritë e konspiracionit dhe keqinformimi nxisin mosbesimin te vaksinat dhe mund të ulin nivelet e vaksinimit për Covid-19 në Amerikë dhe Britani nën normat e nevojshme për të mbrojtur komunitetet ndaj sëmundjes, thuhet në një studim të publikuar të enjten.
Studimi, ku morën pjesë 8000 njerëz nga të dyja vendet, zbuloi se më pak njerëz do ta “bënin patjetër” vaksinën sesa vlerësimi i shkencëtarëve, sipas të cilëve është e nevojshme që vaksinën ta marrë 55% e popullsisë për të siguruar të ashtuquajturin “imunitet të tufës”.
E ndërkohë, e shpejtë në maksimum për dhënien e dritës jeshile u tregua Mbretëria e Bashkuar, e cila për çështje orësh pret shpërndarjen e 40 milionë dozave të vaksinës nga Pfizer dhe BioNTech.
Për këto zhvillime foli në A2 nga Londra eksperti i shëndetit publik, Laidon Shapo, i cili tha se nuk duhet të ekzistojë frika për të bërë vaksinën, pasi i ka kaluar të gjitha testet dhe është e sigurt.
“Çdo proces vaksinimi ka hasur probleme, duke u gjykuar nga popullata. Efektshmëria e vaksinës, siguria e saj, janë trajtuar me shumë kujdes nga autoritetet në Britaninë e Madhe. Vaksina u pa në fazën e fundit, me një efektshmëri 95% tek të gjitha grupmoshat, kjo tregon se nuk ka arsye nga popullata për të qenë e frikësuar nga efektet. Efektet anësore, të tipit psikologjik, lidhen me faktin se vaksina është e re. Problemet qëndrojnë vetëm në transportimin e vaksinës, e cila duhet të qëndrojë në temperatura shumë të ulëta”, tha ai.
Si vepron vaksina e Pfizer dhe BioNTech?
Eksperti u shpreh: “Përmes vaksinimit, personat marrin një variant sintetik të virusit. Kjo do të thotë se në trup futet një proteinë sintetike e sipërfaqes virale, e gjembaçëve, aty ku kapet virusi. Qelizat e lexojnë këtë menjëherë dhe e marrin si një trup të huaj dhe ndaj saj reagojnë duke krijuar antitrupa dhe qeliza T, të cilat shkojnë të neutralizojnë këtë trup të huaj. Kërkohen 28 ditë nga marrja e dozës së parë të vaksinës që të krijohet imuniteti. Këtë e kanë treguar studimet e fazës së tretë të vaksinës Pfizer dhe BioNTech. Pas bërjes së vaksinës, duhen 12-14 ditë që të nisi krijimi i antitrupave, mbas 21 ditësh kërkohet injektimi i dozës së dytë të vaksinës dhe pas 7 ditësh nga doza e dytë, personi quhet se ka imunitet. Tashmë diskutohet se si do të jetë ky imunitet, se sa do të zgjasë. Një përgjigje tani mund të japim vetëm duke iu referuar “kushërinjve” të tij korona. Ata kalojnë një imunitet nga 6 muaj deri në shumë vite. Është bërë një studim dhe është parë që ata që kanë kaluar Sars në vitin 2003, një pjesë e tyre, 20-30% janë të gatshëm të luftojnë Covid-19. Kjo na bën të jemi disi entuziast”.
