Spitali Covid 4 ka pritur pacientët të parë të cilët marrin trajtim për koronavirusin.
Personeli mjekësor u shpreh se hapja e spitalit Covid4 është një lehtësim për mjekët si edhe një shpresë, për të gjithë pacientët që janë të infektuar.
“Pacientët të cilët janë janë të destinuar për Covid4 janë kryesisht pacientë që vijnë nga spitali Covid1 dhe Covid3. Pacientë të cilët janë në kushte më të përmirësuara nga ana klinike, por që kërkojnë një periudhë akoma monitorimi dhe ndjekjeje për proçesin e tyre të rehabilitimit.
Aktualisht stafi mjekësor i përbërë nga mjekët, infermierët, laborantët, farmacistët është gati. Është një ekip më së miri i trajnuar me eksperiencë dhe nga dy spitalet e tjera Covid1 dhe Covid2, plus staf shtesë”, tha Dr. Esmeralda Meta.
Spitali Covid4 duket se do të shërbejë si pritës për pacientët që do të lenë spitalet Covid1, 2 dhe 3, të cilët janë të mbingarkuar, duke krijuar në këtë mënyrë shtretër të lirë.
Ky spital ka një kapacitet prej 100 shtretërish. Prej kohësh ka denoncime se në spitalet Covid vendet janë ezauruar, pacientët presin me orë në ambulanca para se të shtrohen, ndërsa alarmi kryeisisht është dhënë nga mjekët që punojnë në këto spitale.
Nuk dihet nëse Covid4 do të mund të ezaurojë problematikën që janë shfaqur deri më tani në 3 spitalet e tjerë, sikundër nuk dihet se kur Qeveria apo Komiteti i Ekspertëve do të vendosin për vënien në funksion të spitaleve rajonale.
Gjatë muajve të fundit e gjithë vëmendja është përqëndruar te Covid-19, ndërkohë që shumë prej pacientëve që vuajnë nga të tjera sëmundje, nuk po arrijnë të marrin shërbimin e duhur shëndetësor, kjo edhe për faktin se shumë nga pavionet në QSUT në muajt e parë u prekën nga koronavirusi, duke u kthyer në vatra të infeksionit.
