Në 1 vjetorin nga tërmeti tragjik që u mori jetën 51 personave, plagosi 3 mijë të tjerë dhe shkatërroi qindra e qindra banesa, Kryeministri Edi Rama ka njoftuar firmosjen e marrëveshjes për ndërtimin 2000 apartamenteve në Durrës.
Rama ndodhet në Abu Dabi, nga ku përmes një videoje në rrjetet sociale, bën të ditur se rastësia e desh që sot në 1-vjetorin e tërmetit të jem këtu për të firmosur financimin e 2000 apartamenteve në Durrës.
“Princi në atë ditë të zymtë hapi derën e shtëpisë së tij dhe ofroi ndihmë. Ministri i Rindërtimit dhe agjencia jonë për zhvillim ka punuar ngushtësisht me inxhinierët e vënë në dispozicion nga princi.
Qeveria shqiptare do të financojë infrastrukturën e lagjes së re në Spitallë, ndërsa sipërmarrësi i Bursh Khalifas, godinës më të lartë në Dubai do të realizojë banesat e Spitallës dhe banesat e reja që do të ndërtohen në vend të pallateve të shembura në Durrës nga tërmeti i 26 nëntorit.
Me princin kemi dakordësuar edhe përfshirjen në zhvillimin e Durrësit dhe jo vetëm.
Sot do të firmosim marrëveshjen mes dy qeverive që do t’i hapë rrugën investimeve që do të nisin nga Durrësi.
Hirësia e tij rikthehet kështu në Shqipëri për herë të dytë. Për herë të parë ai u ul me shpejtësi në Kukës. Ai rikthehet në Shqipëri pas 20 vitesh jo vetëm për të ndihmuar familjet e prekura nga tërmeti por edhe për na mbështetur për Shqipërinë që duhet duke u bërë pjesë përmes projekteve dhe investimeve afatgjata duke nisur nga Durrësi ku parashohim një investim të parë të madh për transformimin e portit të mallrave në Durrës në një nga portet më rë bukura në Durrës. Edhe njëherë më të keqen e kemi lënë pas”, thekson Rama.
