Kolegji i Posaçëm i Apelimit ka lënë në fuqi vendimin e KPK-së lidhur me subjektin e rivlerësimit Petraq Dhimitri, duke e hequr përfundimisht nga lista e magjistratëve. KPK në korrik të këtij viti kishte ndërprerë procesin e rivlerësimit kalimtar për subjektin e rivlerësimit, z. Petraq Dhimitri dhe kishte deklaruar humbjen e së drejtës së këtij subjekti për t’u emëruar gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare.
Dhimitri është aktualisht në pritje të apelit pasi u dënua nga gjykata e shkallës së parë për krimet e rënda për veprën penale të korrupsionit aktiv të gjyqtarit bashkë me dy të tjerë. Dhimitri është deklaruar në gjykatë i pafajshëm.
Në vendimin e arsyetuar të KPK shpjegohet se ndërprerja e procesit të rivlerësimit ka ardhur pas depozitimit më datë 24 janar, të një vendimi të Këshillit të Lartë Gjyqësor, KLGJ për mbarimin e statusit të magjistratit për Dhimitrin, për shkak të dorëheqjes së tij.
Dhimitri e ankimoi vendimin e KPK-së, i cili u la në fuqi gjatë ditës së sotme nga Kolegji i Posaçëm i Apelimit.
Petraq Dhimitri, u hoq nga lista e magjistratëve për rivlerësim pasi mësohet se ka dhënë dorëheqjen nga pozicioni. Ai është një nga tre gjyqtarët e dënuar në shkallë të parë dhe në pritje të apelit për korrupsion në çështjen e njohur si “el classico”.
Vendimi i Kolegjit
Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Ina Rama relatore, Albana Shtylla, Rezarta Schuetz, Sokol Çomo anëtarë, shpalli vendimin për çështjen (JR) nr.41/2020, datë 21.09.2020, që lidhet me ankimin e subjektit të rivlerësimit Petraq Dhimitri, kundër vendimit nr. 271, datë 06.07.2020 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 66, pika 1, germa “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 271, datë 06.07.2020 të Komisionit të Pavarur të Kualifikimit, që i përket subjektit të rivlerësimit Petraq Dhimitri.
Ky vendim është përfundimtar dhe ka efekt të menjëhershëm.
U shpall në Tiranë, më datë 23.11.2020.
