Udhëheqësit e 20 ekonomive më të mëdha u zotuan ditën e diel se nuk do të kursejnë asnjë përpjekje për të furnizuar me ilaçe, teste dhe vaksina kundër Covid-19 në mënyrë të drejtë të gjithë njerëzit, duke reflektuar mbi shqetësimet se pandemia mund të thellojë ndarjet midis të pasurve dhe të varfërve në botë.
Pandemia dhe perspektivat e një rikuperimi të pabarabartë dhe të pasigurtë ekonomik ishin në qendër të samitit dy-ditor nën drejtimin e Arabisë Saudite, e cila do t’i dorëzojë presidencën e G20 Italisë muajin tjetër, shkruan Reuters.
“Pandemia Covid-19 dhe ndikimi i saj i pashembullt në drejtim të jetëve të humbura, mjeteve të jetesës dhe ekonomive të prekura, është një tronditje që ka zbuluar dobësitë në gatishmërinë dhe përgjigjen tonë, si dhe nënvizon sfidat tona të përbashkëta. Kombet e G20 do të punojnë për të mbrojtur jetën, për të siguruar mbështetje me një fokus të veçantë tek më të rrezikuarit dhe për t’i kthyer ekonomitë tona drejt rritjes, mbrojtjes dhe krijimit të vendeve të punës për të gjithë.”, thuhej në komunikatën përfundimtare.
Për vaksinat, testet dhe trajtimet, udhëheqësit thanë:
“Ne nuk do të kursejmë asnjë përpjekje për të siguruar qasjen në mënyrë të përballueshme dhe të barabartë për të gjithë njerëzit. Ekziston një njohje e qartë nga G20: Nëse lëmë ndonjë vend prapa, të gjithë do të mbetemi pas.”.
Ata gjithashtu riafirmuan angazhimin e tyre për të përdorur të gjitha mjetet e disponueshme të politikave për sa kohë që kërkohet, për të mbrojtur jetën, vendet e punës dhe të ardhurat.
