Ministria e Shëndetësisë në Turqi, ka vendosur të mos lejojë më pacientët e huaj me kovid, të kurohen atje. Kjo për shkak se kapacitetet spitalore po mbushen. Mediat turke raportojnë se rreth 80% e shtretërve në spitale janë zënë.
Në një deklaratë nga Drejtoria e Përgjithshme e Aviacionit Civil e Turqisë, thuhet se deri në një vendim të dytë, dërgimi i pacientëve me kovid nga vendet e tjera të botës është e ndaluar.
“Brenda kornizës së rekomandimit të Ministrisë së Shëndetësisë, sjellja e pacientëve pozitivë Covid-19 në vendin tonë me aeroplan privat është e ndaluar deri në një urdhër të dytë. Nëse ndalimi i përmendur nuk respektohet, sanksionet administrative do të zbatohen për bizneset përkatëse”, thuhet në deklaratë.
Kujtojmë që ky vendim prek edhe Shqipërinë. Kjo për arsye se shumë pacientë të infektuar me kovid, kanë shkuar të marrin trajtim në Turqi.
