“Shefqet Ndroqi”, i kthyer prej muajsh në një spital “Covid2”, duket se ndodhet në një situatë kaotike, ku pacientët janë të detyruar të presin me orë të tëra në ambulanca, para se të pranohen në urgjencën dhe më pas në pavionet ku kurohen ata që janë infektuar me Covid-19.
Një situatë e ngjashme si ajo para spitalit Infektiv, në javën e shkuar, ku ambulancat prisnin në rradhë, njëlloj si ato furgonët e linjave të transportit që transportinin udhëtarët.
Në një justifikim lidhur me pamjet që u denoncuan nga mediat pak ditë më parë, nga Komiteti i Ekspertëve u tha se nuk bëhej fjalë për mungesë vendesh në spitale, por në ambulanca kryhej triazhimi i pacientëve. Pra me pak fjalë vlerësohej gjendja e tyre, nëse ishin ose jo në parametrat për t´u shtruar apo për t´u pranuar në spital.
Dhe kur situata mbetet kaotike sa te Infektivi, aq edhe te Shefqet Ndroqi, në varësi të javëve, nuk dihet ende pse nuk vihet në punë spitali Covid4, megjithëse duket se më shumë sesa godina, mungojnë stafet mjekësore të specializuara.
Mëngjesin e sotëm një mjek i Urgjencës denoncoi situatën te Shefqet Ndroqi, ndërsa prej 3 orësh mundohej ti jepte ndihmën pacientit brenda ambulancës.
Ende nuk është e konfirmuar nëse në spitalin Covid-2 janë ezauruar të gjithë shtretërit, apo çfarë protokollesh po ndiqen.
Para ambienteve të spitalit nuk mungojnë edhe familjarët të irrituar, pasi të afërmit e tyre prej orësh ndodhen në autoambulanca dhe shumë prej tyre kanë nevojë për oksigjen.
Mjeku Dritan Koçiaj bëri thirrje përmes rrjeteve sociale se në Sanatorim nuk ka shtretër, ndërsa pacientët po marrin trajtim në ambulanca.
Koçiaj i kërkoi kryeministrit Edi Rama dhe Komitetit të Ekspertëve të reagojnë menjëherë, pasi sistemi po shkon drejt kolapsit.
Ai denoncoi se natën e kaloi duke qëndruar me një pacient në autoambulancë në derën e “Shefqet Ndroqit”, pra “Covid-2”, pasi nuk ka më vende në urgjencën pritëse dhe në pavionin e këtij spitali. Në vijim, mjeku thotë, se ashtu si ai janë edhe 6 autoambulanca të tjera me pacientë.
