Kryeministri Edi Rama shpërfilli mbrëmjen e djeshme në emisionin “Real Story”, deklaratat e bëra nga Dashamir Peza, një prej miqve të tij dhe ish-deputet i PS-së, i cili pohoi se kasetën e Krushës së Madhe e kishte marrë ai dhe e kishte dorëzuar te BBC.
Reagimi i Pezës rrëzonte aludimet dhe akuzat e Bellamicës, i cili kishte realizuar filmimin amator të masakrës së Krushës së Madhe, dhe akuzonte Lulzim Bashën se i kishte zhdukur kasetën me filmimet.
Por Kryeministri ka zgjedhur të cilësojë deklaratat e Pezës si “detaje” për të cilat nuk ishte i interesuar.
“Nuk jam as hetues, as i interesuar për detaje, unë nuk kam asnjë arsye të besoj që dëshmitari nga Kosova, por edhe të tjerë që kanë folur, kanë ndonjë motiv që t’i turren Lulzim Bashës dhe ta mbulojnë me shpifje.
Këtu problemi është lidhur me punën në të shkuarën, pasi Basha nuk ka dalë asnjëherë të flasë qartë se cili ka qenë roli i tij. Gjithë kjo që krijohet si paqartësi, si konfuzion, dhe që njerëzit të ndahen mes patriotëve dhe tradhtarëve, është mungesë e burrërisë së liderit të opozitës në përballjen me faktet.
Nuk ka asnjë gjë tjetër këtu, as kam bërë akuza, as kam dashur të përfitoj ndonjë gjë nga kjo”, u shpreh Rama.
