Parisi, Zyrihu dhe Hong Kong janë kthyer në qytetet më të kushtueshme në botë pasi pandemia Covid-19 ka ndikuar në rritjen e çmimeve të artikujve të përditshëm.
Indeksi i EIU krahasoi çmimet e 138 mallrave dhe shërbimeve për rreth 130 qytete në shtator 2020 dhe zbuloi se çmimet mesatarisht u rritën 0.3% gjatë vitit.
Në përgjithësi, qytetet në Amerikë, Afrikë dhe në Europën lindore janë bërë më pak të shtrenjta, ndërsa në Europën perëndimore më të kushtueshme. Kjo pjesërisht shpjegon dhe rritjen e vlerës së monedhave europiane kundrejt dollarit amerikan.
Gjeneva dhe Kopenhaga janë dy qytetet e tjera europiane që renditen në dhjetëshen më të shtrenjtë, bashkë me Singaporin, Tel Aviv, Osaka, New York dhe Los Angeles.
Singapori dhe Osaka i Japonisë, të cilat vitin e kaluar zunë vendin e parë, janë bërë më pak të kushtueshme për shkak të një eksodi të punëtorëve të huaj që ka çuar në një rënie të kërkesës dhe kësisoj të çmimeve. Në Japoni, qeveria gjithashtu ka subvencionuar kosto të tilla si transporti publik.
Indeksi zbuloi se çmimet ishin të ndikuara nga pesë trende kryesore: luhatjet e monedhës, problemet e zinxhirit të furnizimit si mungesa e mallrave të caktuara, veprimet e ndërmarra nga qeveritë si kontrollet e çmimeve, qasja më e kujdesshme e konsumatorëve për frikën se të ardhurat e tyre mund të preken dhe ndryshimet në stilin e jetës.
Raporti vë në dukje se ajo që konsumatorët tani e shohin si thelbësore është zhvendosur dhe se ata kërkojnë për çmime më të lira duke rritur konkurrencën për mallra më pak të kushtueshme.
Sidoqoftë, çmimet e produkteve të cilësisë së lartë kanë qenë relativisht të paprekura pasi të pasurit nuk i kanë ndryshuar zakonet e tyre dhe blerjet kanë qenë pothuajse të njëjta.
Çmimet e prodhimeve të konsumit kanë mbetur të qëndrueshme në përgjithësi, por çmimet e alkoolit dhe duhanit janë rritur me këtë të fundit që raporton rritjen më të lartë nga viti në vit.
Përveç duhanit dhe alkoolit u vu re një rritje në çmimet e librave apo produkteve elektronike. E kundërta ka ndodhur me veshjet, kërkesa për të cilat u ul dhe njëkohësisht dhe çmimi i tyre.
Reykjavik, Sao Paulo dhe Rio de Janeiro janë qytetet që ranë më shumë në renditje. Amerika Latine është goditur rëndë nga vlera e ulët e monedhës dhe nivelet në rritje të varfërisë.
Qyteti me koston më të ulët të jetesës është Damasku i Sirisë, Tashkenti i Uzbekistanit, Lusaka i Zambisë dhe kryeqyteti i Venezuelës, Karakasi.
EIU pret që tendencat e çmimeve të mbeten të ngjashme në 2021 pasi ekonomia globale nuk ka gjasa të kthehet në nivelet para-pandemike deri në 2022.
