Rreth 36 objekte arsimore përfshirë shkolla të mesme, 9-vjeçare, kopshte dhe çerdhe të dëmtuara nga tërmeti i 26 nëntorit do t’i nënshtrohen ndërhyrjeve për ndërtim dhe rikonstruksion.
Punimet te këto objekte arsimore do të zhvillohen me fazën e dytë të programit “EU4Schools” të Bashkimit Europian. Në listën e miratuar nga Ministria e Rindërtimit ndërhyrjet parashikohen të kryhen për rindërtimin e 21 objekteve arsimore dhe 15 të tjera do t’i nënshtrohen procesit të rikonstruksionit.
Në total nga programi i donatorëve parashikohet të ndërtohen dhe riparohen 73 objekte arsimore, ku në fazën e parë të programit EU4S ishin 22 shkolla, në fazën e dytë të projektit të BE-së do të jenë 40 shkolla. Nga donatorë të tjerë, si KfW do të ndërtohen 3 shkolla, 4 objekte të tjera me fondet e shteteve Slloveni dhe Sllovaki dhe 3 nga shteti i Katarit.
Nga Fondi shqiptar i Zhvillimit (FSHZH) parashikohen të ndërtohen 37 objekte arsimore. Sipas Ministrisë të Rindërtimit, punimet për 34 shkolla pritet të përfundojnë në dhjetor të 2020 dhe për 3 objekte të tjera në janar të 2021. Në qarkun e Durrësit nga FSHZH pritet që brenda 26 nëntorit të përfundojnë punimet për 9 shkolla.
Nga Bashkia e Tiranës në total parashikohen të kryhen ndërhyrje në 37 shkolla. Ministria e Rindërtimit pohoi më herët se kanë filluar punimet për shkollat “Sami Frashëri” (aty ku ka qenë dhe jo në Paskuqan), “Mangull” dhe “Murat Toptani”. Në qarkun e Tiranës, 14 objekte të tjera janë në proces shembje dhe piketimi.
Nga buxheti i shtetit për vitin 2020, për rindërtimin e objekteve arsimore janë 7,5 miliardë lekë fonde. /Monitor/
