Ish-Kryeministri Sali Berisha tha mesditën e sotme në një lidhje direkte me Abcnews se në spitale mungojnë mjekët dhe infermierët.
Berisha tha se ishin të gjitha kushtet për t´u plotësuar stafet mjekësore, që të trajnoheshin 100 reanimatorë, por nuk u bënë.
“E dini ju se në spitalet Covid po ikin stafet mjekësore? E dini ju se në spitalin Covid3 ka vetëm 4 shtretët reanimatorë dhe nuk ka staf? Ja kjo është gjendja”, tha Berisha.
Ndërsa e cilësoi Kryeministrin Edi Rama si një mashtrues dhe xhahil, Berisha tha se një nga anëtarët e Komitetit ia ka thënë se s´mund të hapin spitalin e Elbasanit sepse s´ka stafe mjekësore të specializuara.
“Tabloja e të dhënave të pandemisë në Shqipëri është me jashtëzakonshmja që mund të jetë dhe kjo nuk ekziston në asnjë vend të planetit. Kjo tablo është rezultat i piramidës së mashtrimeve, falsifikimeve dhe vjedhjeve në menaxhimin e kësaj pandemi nga xhahiri i Surrelit.
Nuk ka vend në planet që në valën e dytë të ketë një rritje me 50 herë të rasteve të infektuara krahasuar me mesataren ditore të tre muajve të parë të pandemisë.
Lidhet më një seri faktorësh si qëndrimin absolut antitestim, antimaskë dhe antishtrim në spital dhe mungesë thelbësore të kushteve higjienike. Kemi të bëjmë vetëm, në dy ditë, Shqipëria ka numëruar 1152 raste kundrejt 1137 raste që ka numëruar nga 8 marsi deri në 31 maj të këtij viti. Ose në 10 ditët e fundit Shqipëria me gjithë falsifikimin që bën ka numëruar vdekje spitalore rreth 2 herë më shumë se nga ato që ndodhen në 8 mars deri në 31 maj. Shqipëria ka gjithçka jashtë kontrollit.
Shqipëria mobilizon 450 shtretër, ndërsa sot me 50 fishimin e rasteve ka rritur me 0.2 % shtretërit spitalor. Këto fakte dëshmojnë se çdo gjë është jashtë kontrollit. Me dhjetëra kam ngritur problemin për tu përballur me një gjendje emergjente është të mobilizosh të gjitha resurset.
Resurset numër 1 janë financat. Nuk gjendet dot një vendim nga qeveria për fondet e emergjencës për përballimin e pandemisë, por ka vendime qeverie për të ndarë më klientelën qindra milionë euro”, tha Berisha.
Ai akuzoi Ramën se ka vjedhur përmes koncensioneve, duke shtuar se Kryeministri nga mëngjesi deri në darkë mbron vetëm vjedhjet.
