Prokuroja e Tiranës Elina Kombi është në proces procedimi disiplinor nga Inspektorati i Lartë i Drejtësisë.
Ky hetim ka nisur pas vetëvrasjes së Bilbil Hasanit në paraburgimin 313-të. Sipas ILD-së, prokurorja nuk ka respektuar procedurat dhe nuk ka kryer hetim të plotë për të ndjerin, i cili vuante nga probleme mendore.
ILD shprehet se po pret vendimin e plotë të Këshillit të Lartë të Prokurorisë për të vendosur lidhur me hapat e mëtejshme.
Hasani u vetëvar në qershor të këtij viti.
Deklarata
Në përgjigje të interesimit të gazetarëve mbi arsyet e procedimit disiplinor të kërkuar për prokuroren e Prokurorisë pranë Gjykatës së Shkallës së Parë Tiranë, E.K., Inspektori i Lartë I Drejtësisë sqaron se hetimi ka nisur pas publikimit në media të vetëvrasjes së të ndaluarit Bilbil Hasani, në paraburgimin e 313. Pas përfundimit të hetimit, ILD i paraqiti Këshillit të Lartë të Prokurorisë kërkesë për procedim disiplinor ndaj magjistrates dhe propozoi masën “Vërejtje publike”, bazuar në gjetjet se magjistratja nuk ndërmori asnjë veprim për të verifikuar gjendjen shëndetësore të të ndaluarit, edhe pse u paraqit një vlerësim mjekësor, se personi vuan nga sëmundje e llojit “Skizofreni tipi Paranoid“.
Për një rast të tillë, Kodi i Procedurës Penale (nenet 43, 182, 259, 327/6 shkronja a, 328/1 dhe 329/a) e detyron prokurorin të kryejë një sërë veprimesh proceduriale, përfshi këtu edhe verifikimin e gjendjes mendore të të pandehurit.
Inspektori i Lartë i Drejtësisë është në pritje të vendimit të arsyetuar të Këshillit të Lartë të Prokurorisë për këtë rast, për të vendosur mbi hapat e mëtejshëm.
