Ndonëse e kishte siguruar vendin e parë të grupin 3 të Ligës A, Franca bëri detyrën ndaj Suedisë, duke fituar me rezultatin 4-2 me përmbysje.
Nordikët kaluan të parët në avantazh me anë të Claesson që shënoi që në minutën e 5-të, por “gjelat” e Deschamps përmbysën gjithçka brenda pjesës së parë me golat e Giroud e Pavard.
Në pjesën e dytë ishte sërish sulmuesi i Chelsea-t Olivier Giroud që shënoi golin e dytë personal dhe të tretin për Francën, ndërsa Suedia provoi të rihapë ndeshjen me anë të Quaison në minutën e 88’, por nuk ia doli të shmangë humbjen, pasi në shtesë ishte Coman që shënoi edhe golin e katërt për “gjelat”.
Ndeshja tjetër në këtë grup ishte ajo mes Kroacisë dhe Portugalisë. Vendasit konfirmuan formën e dobët në Ligën e Kombeve teksa pësuan humbjen e tretë radhazi.
Ballkanasit kaluan të parët në avantazh me anë të Mateo Kovacic, por në fillim të pjesës së dytë gjithçka u komplikua, pasi mesfushori Rog mori kartonin e dytë të verdhë dhe la kroatët me 10 futbollistë.
Portugalia shfrytëzoi menjëherë epërsinë numerike për të rikthyer baraspeshën me anë të talentit të Manchester City-t, Ruben Dias dhe më pas për të gjetur edhe golin e avantazhit me sulmuesin Joao Felix.
Kovaçiç riktheu edhe njëherë baraspeshën për Kroacinë në minutën e 65-të, por kur dukej se gjithçka po shkonte drejt barazimit, ishte sërish mbrojtësi 23-vjeçar Ruben Dias që shënoi golin e fitores për luzitanët.
Kështu, Franca kualifikohet për në fazën finale të Ligës së Kombeve, ndërsa përfundon këtu aventura për fituesit në fuqi të trofeut, Portugalisë. Suedia nga ana tjetër, duke u renditur e fundit në grup zbret në Ligën B.
