Ish-Presidenti Bujar Nishani ka reaguar lidhur me akuzat që Kryeministri Edi Rama, dhe më pas një qytetar i Kosovës, ka ngritur ndaj Lulzim Bashës, kryetar i PD, mbi krimet e ndodhura në Kosovë dhe rolin e kreut demokrat në hetimin e asaj që njihet si shtëpia e verdhë.
Nishani shkruan se është publikuar fakti se personi akuzues ndaj Lul Bashës për marrjen e kasetës së masakrës serbe në Krushë të Madhe, e ka dërguar këtë kasetë tek gjigandi mediatik BBC në 1999 dhe jo tek Lul Basha në 2002.
Ish-Presidenti thekson se kaseta është poseduar edhe nga televizioni norvegjez, ndërsa shton se personi që e ka dorëzuar atë, u keqpërdor për shpifjen nga filoserbët e Tiranës.
“Në fakt, problemi dhe poshtërsia nuk qëndron tek një mjeran i keqpërdorur si dëshmitar i rremë prej sektit filoserb të rilindsave.
Të tillë nuk ka kurrfarë vështirësie të gjesh sot ndër mjerimin dhe injorancën që grupimet korruptive, hajnisë e tradhëtisë përpiqen të ruajnë për të pushtetuar pa kokëçarje.
Ky fakt tregon edhe njëherë më shumë se sekti serbofil i Tiranës nuk përmban dot më shumë se modelet dhe praktikat e ish Sigurimit xhahil të Shtetit hoxhist !
Serbofili i Tiranës prej më shumë se 20 vitesh (ky rezulton edhe pushtetari më i vjetër në 30 vitet e pluralizmit në Shqipëri), ka mundur të përdorë e përfitojë çdo manipulim, mashtrim, intrigë, fasadë, trillim e keqbërës, në 20 vitet e pushtetit të tij !
Blerja, korruptimi, keqpërforimi i medias dhe i keqbërësve, nuk ka qenë veç një ves malinj por model i të ligës, poshtërsisë, hajnisë e tradhëtisë ndaj Shqipërisë e shqiptarëve.
Ky nuk është rasti për të mbrojtur Lul Bashën nga shpifja dhe diversioni i rradhës prej një sekti të zi oligarkësh të korruptuar që vjedhin pa u ngopur çdo ditë edhe kacidhet nga xhepat e shqiptarëve të mjerë.
Ky është rasti për të çimentuar edhe më shumë të drejtën e reagimit masiv të shqiptarëve ndaj poshtërsisë, mashtruesve që gënjejnë e trillojnë që të vjedhin papushim dhe vjedhin e grabisin papushim që të mashtrojnë përsëri dhe ushqejnë barkun e mashtruesit”, shkruan Nishani.
