Besart Kadia, i emëruar së fundmi në Qeverinë Rama në postin e zv.ministrit të Financave, tha në emisionin “Zonë e Lirë” se nuk ka hequr dorë nga idetë e tij pro biznes, pro tregut të lirë dhe konkurencës.
Kadia tha se Edi Rama ka qenë konseguent në idetë e tij që i ka çuar përpara.
“Jam kundër PPP që bëhen pa konkurencë, por s’jam kundër PPP kur bëhen me konkurencë. Unë mendimet nuk i kam ndryshuar.
Unë kam qenë në PD para 3 vitesh, unë mendoj se në pushtet nuk vihet me protesta, nuk mbështes largimin nga Parlamenti apo bojkotin e zgjedhjeve.
“Alternativa” ka qenë një platformë, e themeluar prej meje, por është një projekt. Iu bashkova Qeverisë si teknokrat-ekonomik, për ti shërbyer Republikës së Shqipërisë. Unë nuk kam hyrë në pazar, as kam marrë ftesë për t’u anëtarësuar në PS”, tha Kadia.
Ai tha se ka pasur një bashkëbisedim shumë korrekt me Ramën, ndërsa nuk përjashtoi mundësitë e bashkëpunimit afatgjatë me Kryeministrin.
“Rama ka vlerësuar idetë e mia në pikëpamjen e tregut dhe ekonomisë”, tha Kadia.
