Policia ka vënë në pranga katër persona të shpallur në kërkim për vepra të ndryshme penale.
Në njoftim thuhet se është arrestuar Artan Nisllaj, 41 vjeç, banues në Tiranë pasi Gjykata e Apelit Gjirokastër e ka dënuar me 18 muaj burg, për veprën penale “Vjedhja duke shpërdoruar detyrën”.
Ai akuzohet se në kohën kur ka qenë drejtor në degën e një banke private në Gjirokastër ka kryer vjedhje në institucionin ku punonte.
Gjatë kontrolleve të policisë u arrestuan edhe tre persona të tjerë. Materialet procedurale i kaluan Prokurorisë pranë Gjykatës së Shkallës së Parë Tiranë.
Njoftimi i policisë:
Kapet dhe ndalohet një shtetas i shpallur në kërkim.
Arrestohen në flagrancë 3 shtetas, për vepra të ndryshme penale. Në vijim të punës për kapjen e personave të shpallur në kërkim, nga strukturat e DVP Tiranë u bë kapja dhe ndalimi i shtetasit Artan Nisllaj, 41 vjeç, banues në Tiranë, pasi Gjykata e Apelit Gjirokastër e ka dënuar me 18 muaj burg, për veprën penale “Vjedhja duke shpërdoruar detyrën”.
Forca e posaçme “Shqiponjat”, në zbatim të Planit të Masave për rritjen e parametrave të sigurisë, parandalimin dhe goditjen e paligjshmërisë dhe evidentimin e personave që posedojnë lëndë narkotike, në Rrugën e Elbasanit kanë ndaluar për kontroll mjetin tip “BMË” me drejtues shtetasin B. K.
Gjatë kontrollit të mjetit, Policia gjeti dhe sekuestroi në cilësinë e provës materiale një sasi të dyshuar lënde narkotike sintetike.
Në përfundim të veprimeve, nga Seksioni për Hetimin e Narkotikëve u bë arrestimi në flagrancë i B. K., 32 vjeç, banues në Tiranë, për veprën penale “Prodhimi dhe shitja e narkotikëve”.
Nga specialistët e Qarkullimit Rrugor u bë arrestimi në flagrancë i shtetasve: D. Sh., 24 vjeç, pasi në rrugën “Ibrahim Rrugova”, u kap duke drejtuar mjetin pa lejen përkatëse; L. H., 41 vjeçe, pasi në Rrugën e Dibrës, u kap duke drejtuar mjetin motor në gjendje të dehur, në masën 0.54 mg/l.
Materialet procedurale i kaluan Prokurorisë pranë Gjykatës së Shkallës së Parë Tiranë.
