Apolonia nuk i trembet aspak Partizanit, madje presioni është te “të kuqtë”. Fierakët e kanë mendjen më shumë në kampionat dhe nuk kanë se çfarë të humbasin në këtë ballafaqim.
Trajneri i Apolonisë, Xhovani Kolela, ka folur për “Panoramasport” përpara ndeshjes, teksa ka pranuar se përballë tyre do të kenë një skuadër me histori të madhe në futbollin shqiptar, por sipas tij shanset për kualifikim në këtë ndeshje do të jenë të barabarta.
“Kemi përballë një skuadër me histori, që e ka në gen trofeun, por ne do të luajmë të qetë, pa presion dhe të gatshëm për ta sfiduar Partizanin. Nuk humbasim gjë, përkundrazi, fitojmë përvojë dhe rritje nga kjo ndeshje. Do t’i vihemi përballë Partizanit, do të luajmë fort dhe bindshëm, pa asnjë kompleks dhe nuk e shohim si tabu kualifikimin për më tej. Me sa shoh, ata e kanë obsesion Kupën, ndërsa ne luajmë qetë, pa ngarkesa, ndaj gjykoj se kemi shanse të barabarta kualifikimi”.
