Kreu demokrat, Lulzim Basha, tha se ndjente keqardhje për largimin e Besart Kadias nga PD te qeveria e Edi Ramës.
“Ndjej keqardhje, që një njeri që u investua aq shumë për politikat liberale ekonomike, bëri zgjedhjen e tij, dhe është vendimi i tij”, tha Basha, lidhur me emërimin e Kadias si zv.ministër i Financave.
Basha tha se shkresa e publikuar në media lidhur me përjashtimin nga PD të Besart Kadias ka rrjedhur, pasi zyrtarisht nga Partia Demokratike nuk ka pasur asnjë reagim.
Kreu demokrat tha se aktualisht jeton në një vilë me qera, e cila është më e vogël se apartamenti që ka pasur më parë.
“Marrëdhënia e familjes sime është e lidhur me një familje normale tiranase, e cila e jepte këtë ambient me qera dhe që s´ka lidhje fare me asnjë oligark. Nuk jam pronar i asnjë vile të vetme. Kam ikur nga apartamenti ku jetoj për shkak se banesa pësoi dëmtime nga tërmeti dhe për një arsye familjare që s´dua ta publikoj.
Akuzat ndaj meje janë shpifje dhe gënjeshtra që synojnë baltosjen timen. Pasuria ime dhe e bashkëshortes sime kanë qenë transparente që nga dita e parë që kam hyrë në politikë.
Ky Kryeministër ka të gjitha mekanizmat për të verifikuar pasurinë time dhe nuk e ka bërë pasi gjithçka është në dritën e diellit.
Kam kallëzuar penalisht shpifësit që nuk kanë ardhur në gjykatë në seancat e deritanishme.
Kontratat e ambienteve që kam marrë me qera janë të depozituara në institucionet shtetërore”, tha Basha.
