Lulzim Basha, kreu i PD, tha se puna e tij pranë UNMIK, ka qene si pjesë e grupit të Task Force për hetimin e krimeve të Sllobodan Millosheviçit dhe serbëve në Kosovë.
Basha theksoi se nga ky grup special u kryen edhe arrestime, dhe unë kam qenë në Gjykatë, kur grupet serbe na rrethuan.
“Roli im në UNMIK kishte lidhje me hetimin e krimeve serbe, transferimin e pushtetit të drejtësisë nga UNMIK tek shqiptarët.
Kurrë nuk kam qenë pjesë e një hetimi për luftëtarët e UÇK. Kam qenë pjesë e hetimit që provoi Miloseviçin si kriminel lufte dhe për genocid”, tha Basha, duke shtuar se kjo është një goditje ndaj Kosovës dhe luftës së UÇK.
Sipas tij, shtëpinë e verdhë, nuk e përmend më as Dick Marty as Carla del Ponte.
“Rama po riciklon akuzat që ka bërë në vitin 2005, të cilat i janë përgënjeshtruar, dhe sot ai po i fut thikat pas shpinës Kosovës”, tha Basha.
Ai sqaroi se është nip Kosove. “Unë jam nip Kosove. Gjyshi im është nga Likovci i Drenicës dhe është larguar nga masakrat serbe bashkë me djemtë e Shaban Polluzhës”, sqaroi Basha, duke shtuar se dallimi mes tij dhe Kryeministrit, është se “unë jam nip Kosove, ndërsa daja i tij, Spiro Koleka shkoi në ish-Jugosllavi”.
