Kryeministri Edi Rama dhe Presidenti Ilir Meta i janë bashkuar urimeve të liderëve botërorë lidhur me shpalljen e Joe Biden si fitues i zgjedhjeve në SHBA, edhe pse Presidenti amerikan Donald Trump, ka premtuar vijimin e betejës ligjore lidhur me shtetet ku ka hedhur akuza për manipulimin e zgjedhjeve.
Edi Rama ka përgëzuar presidentit e ri të SHBA-ve Joe Biden për fitoren në zgjedhjet presidenciale. Rama uron Biden ndërsa shprehet se është i lumtur të vijojë bashkëpunimin me të për forcimin e partneritetit strategjik me Shtetet e Bashkuara
“Ishte një privilegj e kënaqësi bashkëpunimi me Presidentin Trump e administratën e tij dhe duke uruar Presidentin e zgjedhur të SHBA Joe Biden për fitoren e tij spektakolare, jam i lumtur të vijoj bashkëpunimin për forcimin e partneritetit strategjik me Shtetet e Bashkuara”, shkruan Rama.
Ilir Meta, përmes një postimi në Twitter i ka uruar fitoren Joe Biden dhe Kamala Harris, duke theksuar se do të punojnë sëbashku për të forcuar lidhjet dhe partneritetin mes dy vendeve.
“Urime Joe Biden dhe Kamala Harris për fitoren në zgjedhjet 2020. Të punojmë me Biden për të forcuar lidhjet dhe partneritetin tonë”, shkruan Meta.
Ditën e djeshme ishte Lulzim Basha që uroi Biden për fitoren.
Gjithsesi situata e zgjedhjeve në SHBA i ngjan asaj të vitit 2000, kur Al Gore në atë kohë shpalli fitoren si President, por pas rinumërimit të votave, humbi garën Presidenciale.
