Për muaj me radhë, kolegjet turke, bashkë me universitetin “Epoka” janë vënë nën shënjestrën e organeve tatimore, policisë dhe prokurorisë, denoncojnë burime pranë këtyre institucioneve arsimore.
Nisur nga situata e krijuar, kompania “Turgut Ozal Education” sha, që ka në pronësi institucionet arsimore, i është drejtuar disa institucioneve shtetërore si edhe ambasadave të huaja duke shpjeguar se janë vënë nën një presion të vazhdueshëm nga persona të caktuar, pjesë e tatimeve, policisë dhe prokurorisë, që sipas tyre, kanë synime të cilat shkojnë përtej zbatimit të ligjit.
Në shkresën që i drejtohet Presidentit Meta, kryeministrit Rama si edhe ambasadave, kompania në fjalë thekson se prej disa muajsh ka kaluar një kontroll nga Drejtoria e Përgjithshme e Tatimeve, e cila nuk ka gjetur asnjë shkelje.
Pas kësaj, sipas tyre, ka filluar edhe presioni përmes policisë dhe prokurorisë, ku mësues, drejtorë shkollash, aksionerë dhe drejtuesi, thirren në polici dhe prokurori dhe iu kërkohet që të pranojnë shkelje, të cilat nuk janë konstatuar gjatë kontrollit.
Ka të dhëna se synimi kryesor është detyrimi për mbylljen e shkollave apo shitjen e tyre tek personazhe të njohur për praktika të tilla në Shqipëri, thanë të njëjtat burime.
Ka dyshime të forta se pas këtij shantazhi fshihen strukturat e shtetit turk si edhe ndonjë personazh i interesuar për grabitjen e këtyre institucioneve duke shfrytëzuar situatën, shtuan burimet.
