Nesër ora 13:45, luhet supersfida Kukësi-Partizani, e vlefshme për javën e dytë të Kategorisë Superiore. Takimi do të luhet në stadiumin “Loro Boriçi”, Shkodër.
Kampionati filloi në mënyrë negative për të dyja skuadrat, teksa Kukësi humbi 2-0 ndaj Tiranës ndërsa Partizani u mposht 2-1 në transfertë kundër Kastriotit.
Problemet më të mëdha në prag të sfidës, i ka Partizani. Përveç humbjes, ndeshja me Kastriotin ka lënë shenja te të kuqtë edhe për sfidën e radhës, ku nesër do të përballen me Kukësin.
Mbrojtësi Eneo Bitri shfaqi probleme në minutat e fundit të premierës së kampionatit, pasi nga goditja që mori gjatë ndeshjes u pa duke çaluar. Në këto kushte mbrojtësi beratas është në dyshim për ndeshjen e nesërme.
Gjatë seancës së djeshme Bitri nuk është shfaqur në formë optimale, kështu që trajneri Daja ka nisur të bëjë llogaritë për të gjetur zëvendësuesin e mundshëm për nesër. Njëri mes Kodrës dhe Feratit shikohet si alternativa për të formuar dyshen e qendrës së mbrojtjes me Belicën, në rast se mbrojtësi beratas nuk ia del.
Gjithsesi, do të jetë seanca e sotme, ajo që të vendosë se kush do të jetë pranë Belicës në qendër të mbrojtjes. Pjesa prapa mbetet problematike për ekipin e Dajës, pasi alternativat mungojnë dhe çdonjëri nga katër mbrojtësit që do të jetë i pamundur shton stresin në ekip.
Formacioni i mundshëm i Partizanit: Hoxha; Idrizaj, Bitri, Belica, Hakaj; Hyseni, Mala, Broja; Asani, Solomon, Bardhi
