Drejtor i Përgjithshëm i Qendrës Kombëtare të Urgjencës Mjekësore, Dr. Skënder Brataj, tha mbrëmjen e së enjtes se ditët e fundit është trefishuar numri i thirrjeve për ndihmë mjekësore tek nr. 127 dhe kërkoi t’i jepej fund, mosrespektimit të masave. Brataj në postimin e tij shprehet se në shtimin e numrit të të infektuarve ka ndikuar edhe hapja e shkollave dhe lokaleve, qëndrimi pa maskë në vendet ku nuk respektohet distanca.
“Stop mosrespektimit të masave, Masat në këtë moment, nuk po respektohen mjaftueshëm! Është thënë disa herë që do të vlerësohet efikasiteti i tyre herë pas here. Tani po përballemi me efektin e hapjes së shkollave!
Ditët e fundit është trefishuar numri i thirrjeve për ndihmë mjekësore drejt 127, po ashtu numri i vizitave në banesë për të sëmurë me Covid-19. Është rritur numri i pacientëve drejt spitaleve!
Manifestimet pa maska të ditëve të fundit, takimet zgjedhore pa respektim të distancimit fizik, janë burim i sigurt i shpërndarjes së infeksionit. Rritja në vazhdim e numrit të të infektuarëve në ditët e fundit është rezultat i hapjes së shkollave, mos respektimit të masave të tjera, qëndrimi në lokale pa maska ku nuk ruhet distancimi fizik”, shkruan Brataj.
Sipas tij, respektimi i masave është shumë i domosdoshëm në këtë moment të pandemisë!
“Vetëm institucionet nuk mund t’ja dalin pa ndihmën e qytetarëve, pa bashkëpunimin tuaj!
Kujdes! Virusi nuk njeh kthim mbrapa. Ai dëmton, ai nuk mban radhë, ai nuk njeh moshë, ai merr jetë, ai jeton vetëm në qelizat humane, ai jeton vetëm në trupin tonë.
Ndalojeni të hyjë në trupin tuaj, respektoni rregullat e higjenës, ruani distancimin fizik, mbani maskën në të gjitha ambientet!
Ndoshta shumë njerëz nuk e mendojnë si e mendoj unë, ndoshta nuk janë dakort me masat, por detyra ime është të informoj qytetarët, është të shpëtoj jetën e njerëzve”, shprehet Brataj.
Në vijim, duke iu drejtuar qytetarëve, Brataj shprehet “shëndeti juaj është i pari, shëndeti i shqipëtarëve është i pari. E rëndësishme është të veprohet tani, sot, menjëherë! Përndryshe pasojat do ti vuajmë të gjithë dhe për një kohë të gjatë!”
“Ruani veten, ruani familjen, ruani shoqërinë, ruani jetën!”, nënvizon Dr. Skënder Brataj.
