Danimarka ka vendosur të izolojë totalisht një rajon të tërë pasi zbuloi se një formë e koronavirusit ka kaluar nga vizonët (një lloj nuselale) te njerëzit.
Ky variant me mutacione i virusit ka shkaktuar mjaft shqetësim jo vetëm në Danimarkë. Kryeministrja e vendit tha se gjithë sytë e botës janë te vendi i tyre dhe se ky mutacion përbën rrezik serioz për shëndetin publik.
Mbi 17 milionë vizonë do të eliminohen për të mos lejuar përhapjen, ndërkohë që deri tani janë konfirmuar 200 raste kur virusi ka kaluar nga kjo kafshë te njerëzit. Britania dhe Gjermania e kanë vendosur Danimarkën në listën e karantinës.
Testimet kanë zbuluar se virusi ka kërcyer nga njerëzit te vizonët në fermat ku këto kafshë rriten për t’u marrë gëzofin.
Te vizonët, virusi ka pësuar mutacion duke bërë që kafshët të infektohen më lehtë. Por kur virusi u transmetua sërish te njeriu, ai erdhi në formën me mutacione.
Shkencëtarët në Danimarkë besojnë se ky variant i bën antitrupat më pak efektivë, shkruan Daily Mail.
Kjo ka shtuar frikën se ky mutacion do e bëjë edhe vaksinën e mundshme më pak efektive. Deri më tani dihet se virusi që vjen nga vizonët nuk është më i rëndë në simptoma.
