Kryeministri Edi Rama tha gjatë seancës së sotme parlamentare, ka mbajtur një fjalim lidhur me rindërtimin dhe pandeminë, ndërsa nuk ka kursyer batutat.
Ai ka ironizuar opozitën e bashkuar, ndërsa theksoi se shqiptarët sot ftohen të votojnë Lulin, për të pasur edhe Monikën dhe Ilirin, dhe Saliun si luan dhe jo si lepur.
“Shqiptarët në 2013 bënë zgjedhjen e duhur, ndërsa në 2020 janë të njëjtët njerëz që shkaktuan 1997”, tha Rama. Ai u shpreh se ne nuk flasim për të kapur 1 votë aty dhe dy atje, por ne atë që themi e bëjmë.
“Ja shëndetësinë falas, ne kemi bërë hapa në drejtim të këtij premtimi. Kemi rimbursuar 600 mijë shqiptarë nga pikëpamja shëndetësore. Sot që flasim janë 110 mln dollarë që paguan qeveria për ilaçet e shqiptarëve”, tha Rama.
Lidhur me procesin e rindërtimit, Rama tha se më 26 nëntor do të hapen një numër jo i vogël shkollash, që u shkatërruan nga tërmeti i një viti më parë.
“Shqiptarët e goditur nga tërmeti tragjik i 26 nëntorit kanë filluar të hyjnë në banesat e reja, ashtu sikundër po ndërtohen ditë për ditë banesa dhe për herë të parë, në këtë vend po ndërtohen lagje të reja, me të gjitha hapësirat e nevojshme”, tha Rama.
Gjithsesi Kryeministri nuk dha shifra se sa qytetarë kanë arritur të marrin banesat e tyre të reja.
“Krizën nga tërmeti ne e kthyem në shpresë për shqiptarët. Ne nuk i lamë familjet e dëmtuara nga tërmeti sikundër u lanë ato familjet e përmbytura në Shkodër. Çfarë do të kishte ndodhur sikur të ishin ato në detyrë? Çfarë do të ndodhte me virusin sikur të ishin ato në detyrë, ku spitalet nuk kishin ilaçe?
Ata që kishin mundësinë ta bënin Shqipërinë më të fortë e legenisën fare dhe sot derdhin lotë krokodili”, tha Rama, duke shtuar se “vetëm budallai nuk ndryshon mendim .
Sipas tij, rindërtimi po ecën me ritme shumë të shpejta.
Rama nuk kurseu batutat me deputetët, të cilat i quajti tapë-topi.
“Ju jeni tapa, ata jashtë janë topi. Pra jeni tap-topi”, u tha Rama, duke shtuar se “sa kohë shqiptarët do të trajtohen si budallenj, atëherë do të humbin”.
“Ju jeni fitimtarë të përkohshëm, keni disa cilësi më të mira se ata që ishin para jush dhe po ju japim mundësinë që të reflektoni”, tha Rama. Në vijim ai shtoi se buxheti i 2021 konfirmon se taksa zero për biznesin e vogël do të mbetet aty dhe deri në 2029 këto biznese nuk do të kenë TVSH deri në 100 mijë dollarë xhiro.
Duke iu drejtuar “opozitës parlamentare”, Rama u tha “jeni deputetë të rënë nga vagonët e mallrave, jeni deputetë padashje. Çdomethënë kjo? Përveç se jeni deputetë padashje jeni edhe antikomunist padashje, jeni bërë antikomunist sepse e keni marrë antikomunizmin si merret muzika me vesh dhe flisni sot ju këtu, që medemek jeni ballist, flisni ju dhe thoni pse si fut në burg, ju flisni njëlloj si deputetët e kuvendit 1945, kush fut në burg?
Këtë sistem për të cilin luftuan gjyshërit tuaj, sikur i ndjeri Mithat Frashëri të kishte dijeni për çfarë thoni ju këtu ….
Në demokraci nuk fut në burg as qeveria as partia as kryeministri, në 45 po. Mos bërtisni këtu sikur jeni deputetët komunistë, mos bërtisni këtu burg burg burg… prandaj nuk dini të ndërtoni shkolla, nuk dini të ndërtoni tekste për shkolla, si ka mundësi që ju këtu ligjvënës të flisni në këtë gjuhë.
Në burg të fut drejtësia, dhe do ti s’do ti cilido që është subjekt i drejtësisë merret drejtësia. Çfarë je ti deputetë i partisë komuniste je? Çfarë bëtë ju për drejtësinë? Pikërisht se s’jemi njësoj, ne kemi udhëhequr reformën në drejtësi.
E keni bërë testin mo vlla? Vetëm ulërin…”, tha Rama.
