Kryeministri Edi Rama deklaroi sot se numri i testeve që bëhen publike çdo ditë nga institucionet shëndetësore janë ato që realizohen nga shteti dhe nuk numërohen testet që bëhen nga privatët.
Rama tha se nga privatët raportohen vetëm rastet që rezultojnë pozitive.
“Të gjitha testet që publikohen janë ato që realizohen nga institucionet shtetërore. Kam folur gjatë me Komitetin e Ekspertëve dhe ne kemi vendosur që të aplikohen testet PCR, jo testet e shpejta, jo se nuk i gjejmë dot, por ekspertët mendojnë se këto janë më të saktat. Por shumë shpejt edhe këtu do të nisin testet e shpejta”, tha Rama.
Ai ironizoi edhe kreun e PD-së, Lulzim Basha, dhe kryetaren e LSI-së, Monika Kryemadhi, lidhur me qëndrimin që mbajnë ndaj pandemisë.
“Basha thotë se ka gjetur formulën se si do të ndalojë pandeminë, duke shtuar numrin e testeve. Po atëherë pse nuk e ndaloi Gjermania apo Franca? Monika del dhe thotë që s’ka virus, ose thotë shkoni në xhami dhe kisha dhe mos i besoni shkencës”, tha Rama.
Ai u shpreh se sistemi shëndetësor është ende larg asaj që kreu demokrat, Lulzim Basha, e konsideron si kolaps.
“Ne kemi hapur spitalin nr 3 Covid, ndërsa është gati edhe spitali i 4-t nëse do të jetë e nevojshme. Por jemi ende larg, shumë larg, asaj që deklarohet mbi kolapsin e sistemit shëndetësor. Ne e kishim të qartë se do të kishte një rritje të rasteve me Covid-19 dhe kemi strategjinë për vjeshtë-dimër”, tha Rama.
