Monika Kryemadhi, kryetare e LSI-së, u shpreh mëngjesin e sotëm, se nuk ka pasur asnjë takim me ish-kryeparlamentaren, Jozefina Topalli, e cila pak ditë më parë zyrtarizoi forcën e saj politike.
Kryemadhi i uroi suksese Topallit në misionin e saj, ndërsa nuk përjashtoi bashkëpunimin me asnjë forcë politike, e cila realisht është kundër Rilindjes dhe Edi Ramës.
“Edi Rama ka frikë nga zgjedhjet dhe mos u çudisni nëse ai nuk hyn në zgjedhje. Rama nuk ka asnjë shans që të dalë i pari në zgjedhjet e 25 prillit dhe jo më të fitojë i vetëm zgjedhjet”, tha Kryemadhi.
Ajo u shpreh se votat në kutitë e votimit nuk i ndryshon as Kodi Zgjedhor dhe as Komisioni i Venecias.
“Ne duhet t’i bëjmë thirrje qytetarëve që të ndëshkojnë me votë Rilindjen dhe Edi Ramën. Të jeni të bindur se pas 25 prillit, ne si LSI do t’i afrojmë jo vetëm qeverisjes, por të gjithë shqiptarëve ata djem dhe vajza që janë personalitete në fushat e tyre.
Ndëshkimi më 25 prill i Rilindjes dhe uzurpuesve të pronave do të marrë fund njëhere e përgjithmonë”, tha Kryemadhi.
