Kryeministri Edi Rama dhe Partia Demokratike kanë shkëmbyer replikat e rradhës në distancë lidhur me projektet e qeverisë për ndërtimin e ndërtesave të shembura nga tërmeti.
Ndërsa Edi Rama ka publikuar një video me pamjet e rindërtimit në Laç, PD ka reaguar me Dorjan Telitin, i cili shprehet se Kryeministri nuk mbajti asnjë premtim.
“Mirëmëngjesi dhe me kantierin e rilindjes në laç, ku zemra e qytetit po rizgjohet nga rrënojat e tërmetit, ju uroj një javë të mbarë”, shkruan Rama, duke publikuar videon e mëposhtme.
Por Dorjan Teliti shprehet se pothuajse 1 vit nga tërmeti, nuk ka asnjë shtëpi të ndërtuar, asnjë shkollë, asnjë spital të përfunduar në Laç.
“Edi Rama nuk mbajti asnjë premtim.
Ai shfaqet në sheshet e ndërtimit me regjinë qëndrore të propagandës dhe sapo ai ikën nga sheshi i teatrit të propagandës largohen dhe fadromat për t’u zhvendosur në një shesh tjetër, atje ku propaganda nis shfaqjen e radhës.
Në Laç, një vit pas tërmetit, vetëm janë lidhur kontratat për banesat individuale dhe janë hedhur themelet.
Për godinat publike, është paraqitur një projekt në 3D por nuk ka asnjë zbatim dhe asnjë projekt nuk është prokuruar.
Nuk ka propagandë dhe regji qëndrore që mund të fshehë të vërtetën”, shprehet Teliti.
