Të gjitha universitetet në Shqipëri do ta zhvillojnë mësimin online, sipas një vendimi të marrë nga Komiteti Teknik i Ekspertëve.
Ashtu edhe siç ishte paralajmëruar, dhjetëra studentë kanë dalë për të protestuar këtë vendim përpara Ministrisë së Arsimit. Me pankarta nëpër duar dhe me të pajisur me maska studentët për protestojnë për vendimin e marrë në 4 ditë përpara se të fillonte mësimi.
Ata kërkojnë rikthimin në auditore. “Nuk duam operacion online”, “Nuk duam operacione online”, ishte një nga pankartat që mbanin në duar studentët e Universitetit të Mjekësisë.
Komiteti Teknik i Ekspertëve vendosi të marrë masa shtrënguese për të parandaluar përhapjen e COVID-19, duke vendosur që mësimi të zhvillohet online nisur nga shifrat e larta të të prekurve dhe vdekurve me COVID-19 në vend.
Ndërkohë, Partia Demokratike, përmes ish-deputetes, Albana Vokshi, e ka kundërshtuar këtë vendim, pasi duke iu referuar nenit 59 të Ligjit të Arsimit të Lartë, thotë se vendimi për ta zhvilluar mësimin online është në shkelje të këtij ligji.
“Ligji i Arsimit të Lartë, në nenin 59 përcakton: Format e studimeve në institucionet e arsimit të lartë janë: a) Studime me kohë të plotë, b) Studime me kohë të zgjatur, Pra, Ligji nuk i njeh studimet në distancë (online). Studentët kanë qenë më të diskriminuarit gjatë periudhës së pandemisë. Pjesa më e madhe e tyre nuk patën asnjë mundësi të ndiqnin studimet online, nuk patën asnjë mbështetje për punësim, asnjë paketë ndihme.
Sa antihumane duhet të jetë një qeveri që vetëm 3 ditë para fillimit të vitit akademik t’i mbyllë universitetet? Sa është kosto për çdo familje studenti? Sa studentë nuk do mund të ndjekin dot studimet pasi nuk kanë asnjë mundësi në shtëpitë e tyre?? Është më keq se në diktaturë. Por historia ka treguar që diktaturave fundi u vjen nga të rinjtë”, shkruan Vokshi.
