Klubet e Kategorisë Superiore, mund të aktivizojnë gjatë një ndeshjeje deri në pesë lojtarë të huaj për sezonin 2020- 2021.
“Panorama Sport” raporton se në mbledhjen e fundit të Ligës Profesioniste, klubet elitare i kërkuan direkt presidentit të FSHF-së, Armand Duka, që përmes Komitetit Ekzekutiv, të miratojë shtimin e numrit të të huajve. Pra, nga 4 që ishte deri në fund të sezonit 2019-2020, të bëhet në 5 lojtarë brenda një ndeshjeje.
Edhe pse FSHF ka qenë vazhdimisht kundër shtimit të numrit të të huajve, këtë herë i është dorëzuar kërkesës insistuese të Ligës, por me një kusht. Vetë klubet kanë kërkuar mirëkuptim nga FSHF-ja që ta miratojë këtë kërkesë për të paktën një sezon, duke qenë se ky kampionat që do të nisë, është më i veçantë se të tjerët, për vetë problematikën që kishte.
Ky rregull i ri do të jetë i vlefshëm edhe për Kategorinë e Parë dhe të Dytë. Kujtojmë që sezoni futbollistik 2020/2021 në vend, starton ditën e nesërme me ndeshjet e Kupës së Shqipërisë.
