Neymar nuk do të luajë më për PSG deri në mes të nëntorit. Braziliani pësoi një dëmtim gjatë ndeshjes kundër Istanbul Basaksehir, të mërkurën, dhe testet mjekësore kanë përcaktuar se duhet të qëndrojë jashtë fushave të blerta për dy javët e ardhshme. Një kohë pushimi, që arrin në një vit të tërë mungese prej lëndimeve, që kur zbarkoi në kryeqytetin francez më 2017.
Në tri vite, Neymar ka qenë i dëmtuar 368 ditë, duke humbur 64 ndeshje, të cilat do të arrijnë në 67, pasi ish-ylli i Barcelonës nuk do të luajë kundër Nantes, nesër, RB Leipzig, të mërkurën e ardhshme dhe ndaj Rennes, më 7 nëntor. Lëndimi më i rëndë që ai ka pësuar te PSG ndodhi në “metatarsalin” e pestë, duke e privuar atë nga 17 ndeshje gjatë sezonit 2017-2018 dhe 18 ndeshjeve në sezonin pasardhës, përveçse nuk ishte në gjendje të luante fazën finale të Ligës së Kampionëve me ekipin parizien.
Pra, Neymar nuk ka qenë një faktor përcaktues për PSG për shkak të dëmtimeve. Që nga sezoni 2017-2018, mesfushori ka humbur edhe disa ndeshje për shkak të pezullimit. Në këtë sezon ai tashmë ka munguar në katër ndeshje: një për shkak të koronavirusit (humbja 1-0 kundër Lens), dy për shkak të pezullimit, pasi kishte goditur Álvaro González me shuplakë gjatë Marseille-PSG, dhe një tjetër për shkak të lodhjes së akumuluar me ekipin kombëtar në muajin tetor. /Telesport
