Presidenti Ilir Meta lëshoi akuza të forta ndaj kryeministrit Edi Rama dhe qeverisë, mbëmjen e kësaj të Premteje, në emisionin “Zonë e Lirë”.
Nisur nga deklarata e Ramës dje në Kuvend, i cili tha: “Çfarë kërkon Meta, të bëhet mbret, apo dëshmor”, kreu i shtetit e quaji Ramën “maskara”, “qen bir qeni”, e “këlysh blloku”.
“Një luan nuk trembet nga një lepur. Lepuri është zënë në çark dhe është marrë peng. Del e thotë ‘jam krenar për babain tim’. Për çfarë është krenar ai, që Kristaqi ka varur Havzi Nelën?! Pse çfarë e kishte të atin ai qen bir qeni? E kishte gjë partizan? More jam Ilir Meta unë, se del e thotë aty që ka dalë të shpërndajë dekorata. Pse kush është Vojo Kushi? Vojo Kushi sot është President. Do ketë 3 milionë Vojo Kushë në shesh. Ore këlysh Blloku. Unë të bëj që të mos kesh vrimë të futesh në Shqipëri”, tha Meta.
Kreu i shtetit tha se Rama është i marrë peng nga manjati Xhorxh Soros. “I thuaj Sorosit të vijë të bëjë investime dhe jo të përplasë Shqipërinë për interesa të veta”, deklaroi Meta. E akuzoi për dëmtim të Kosovës e Shqipërisë. Meta tha se Rama po largon të rinjtë nga vendi dhe po u bën presion krerëve të institucioneve në Shqipëri.
Ai tha se qeveria, përmes keqmenaxhimit të situatës së Covid, po çon në vdekjen e qytetarëve. “Po vdesin njerëz në spitale dhe nuk i deklarojnë”, shtoi Meta.
Lidhur me rivotim në Kuvend të ndryshimeve të njëanshme në Kodin Zgjedhor, Meta tha se “akti i djeshëm është një përpjekje për ta nxjerr Shqipërinë nga çdo perspektivë evropiane që ekziston”.
