Erion Braçe, zv.Kryeministër, i ka kërkuar policisë që të garantojë izolimin e atyre që janë pozitiv me Covid-19, atyre që presin përgjigjen e tamponeve, ndalimin e ceremonive mortore dhe zbatimin e protokolleve në bare, lokale dhe restorante.
Sipas Braçes, angazhimi i policisë vetëm ndaj atyre që nuk mbajnë maskë, është i pamjaftueshëm për shmangien e një mbylljeje të dytë. Në fakt vendimi që detyron qytetarët për mbajtjen e maskës në mjedise të hapura është kontestuar si masë nga disa prej ekspertëve të shëndetësisë, që kanë dhënë alarmin se problem mbetet fakti se persona të infektuar mund t’i gjesh në bare dhe restorante, atje ku maska nuk mbahet.
“Ligji ligj e njësoj për të gjithë! Po a mund të bëhemi me efektiv? Patjetër që po!
1. Si qytetarë; Mbaje maskën për vete e familjen tënde, jo për qeverinë. E thamë, maska në fytyrën tënde nuk është politikë për politikë, por bashkë me distancën e duhur dhe higjienën janë shpëtim për ty!
Ilir Meta që nuk mban maskë e kërkon tampon, nuk të mbron, thjesht tallet me ty; Monika Kryemadhi që nuk mban maskë sepse nuk duhet të mbajë gojën kundër gjithkujt, është rrezik për ty!
E thjeshtë, mbro veten, mos e bëj veten për spital, kushton shumë më pak për ty e për shoqërinë!”, shkruan Braçe në rrjetet sociale.
Në vijim, referuar gjobave që vendosen nga policia ndaj atyre që nuk mbajnë maska në mjediset e hapura, Braçe shkarun se kaq nuk mjafton për të shmangur një mbyllje të dytë.
“Si shtetarë, ruajtjes të ligjit e rregullit; Është e thjeshtë kjo që sheh në foto, tre policë në detyrë që lëvizin me makinë, shohin dikë pa maskë e presin një gjobë. Po a është efektive kaq? Nuk mjafton! Ja përse; policia duhet të jete garante për izolimin e gjithkujt që është pozitiv, familjes së tij; policia duhet të jetë garante për izolimin e gjithkujt që ka bërë një tampon e pret përgjigje, familjes së tij;
– policia duhet të jetë garante e ndalimit të çdo ceremonie mortore për çdo familje që ka pësuar humbje nga cilado arsye-Covid apo zemër, aksident etj; policia duhet të jetë garante e ndalimit të çdo dreke për vdekje a qëllim tjetër ku grumbullohen turma njerëzish; task forca e ngritur për këtë qëllim duhet të jetë garante e ndalimit të çdo shkeljeje protokolli në bare, lokale, restorante;
Duhet ta bëjë këtë me çdo çmim dhe cilido duhet të bindet; Alternativa për ta është një mbyllje e afërt, kolektive që do rrënojë ata e vendin! I bëjmë dot këto; Ju si qytetare e ne si qeveri! Bashkë! bashkë! Mos dëgjoni idiotë që ju duan të sëmurë, në spital patjetër, të vdekur madje për politikën e tyre të ndyrë!
E kuptoni; Këta mendojnë se sa më shumë nga ju të sëmurë, sa më shumë nga ju të vdekur, aq më e fortë garancia se Lyli, Monika, Saliu e Iliri vijnë në pushtet! Më të poshtër se kjo nuk ka! Ndaj mbaje maskën e zbato rregullat e sëmundjes”, shkruan Braçe
