Vrasja e 50-vjeçarit, Ahmet Toska, mund të jetë kryer nga vrasës me pagesë për pazare të prishura në Greqi në kohën kur ai ka qenë për disa kohë emigrant në tokën helene.
Hetuesit u përqëndruan në disa pista për të zbardhur krimin, përfshi këtu edhe ndonjë konflikt për çështje pune apo ato të pronësisë. Por duket se hetuesit kanë rrëzuar të gjitha pistat e ngritura dhe tashmë janë përqëndruar te e shkuara e viktimës.
Burimet pohuan se 50-vjeçari ka qenë emigrant disa kohë në Greqi. Vrasja e tij mund të jetë kryer nga vrasës me pagesë për ndonjë pazar të prishur në vendin fqinj, kur ai ka qenë në emigracion. Këtë fakt grupi hetimor e ka mbështetur tek mënyra e ekzekutimit me tre plumba në kokë e një në zemër.
Mësohet se bashkëshortja e viktimës ka pohuar kur është marrë në pyetje se ‘njëri më foli duke më thënë largohu pak’.
Shkuarja pranë viktimës me maska, ekzekutimi dhe largimi në këmbë për afro 100 metra, tregon se autorët e kanë ndjekur prej kohësh viktimën dhe itinerarin që ai përshkruante çdo ditë.
Sekuestrimi i afro 12 kamerave të sigurisë të bizneseve aty pranë vendit të ekzekutimit, por që nuk është konstatuar gjë konkrete, tregon se sa i sofistikuar ka qenë plani i ekzekutimit të 50-vjeçarit Toska.
Viktima në vendin ku jetonte njihej si person i qete, i respektuar, familjar.
