Avioni me katër fëmijë dhe një grua të riatdhesuar është ulur në pistën e Rinasit. Mes tyre është edhe Endri Dumani, të cilët u nxorën nga kampi famëkeq në Siri, “Al Hol”.
Në avion ishte edhe kryeministri Edi Rama, i cili mbërriti dje në Liban ku u takua me fëmijët dhe gruan që u nxorën nga kampi.
Floresha Rasha me fëmijët e saj Amar Rasha, Emel Rasha dhe Hatixhe Rasha së bashku me djalin e familjes Dumani, Endri Dumani janë shqiptarët që u nxorën nga kampi famëkeq “Al Hol”.
Rama e konsideroi operacionin të ngatërruar, por të suksesshëm.
“Janë operacione komplekse që lidhen me territore që duhet marrë parasysh më shumë se 1 faktor. Nuk kemi asnjë marrëdhënie me regjimin e Damaskut, duhet marrë leje edhe prej tyre. Anti-terrori ka qenë në terren prej 4 javësh. Nxjerrja e fëmijëve nga kampi është një proces i ngatarruar, janë familjarë që mbeten në pozicionet e tyre të radikalizuara, sikundër ka roje që nuk është aq e thjeshtë për tu kaluar”, tha Rama.
