Komisioni i Ligjeve ka rrëzuar dekretin e Presidentit Ilir Meta për kthimin në Kuvend të ndryshimeve në Kodin Zgjedhor. Deputetët që votuan pro ishin vetëm Adriatik Alimadhi dhe Korab Lita, ndërsa 15 deputetë të tjerë votuan kundër.
Presidenti Meta ka deklaruar një ditë më parë se ndryshimet cënojnë parimet demokratike, ndërsa paralajmëroi një krizë zgjedhore, nëse Kuvendi nuk reflekton.
Presidenti Ilir Meta gjithashtu iu drejtua Komisionit të Venecias ku duket se gjithçka lidhet me ndalimin e koalicioneve parazgjedhore.
Kreu i Shtetit tha se iu drejtua Venecias për garancitë proceduriale lidhur me ndryshimet në Kodin Zgjedhor. Meta tha se nuk duhet të ketë një përshkallëzim të situatës së rënduar, ndërsa kërkoi një reflektim nga mazhoranca.
Meta kërkoi nga mazhoranca dhe Kryeministri Edi Rama që të trajtojnë me përgjegjshmëri çështjet që kanë të bëjnë me Kodin Zgjedhor.
“Opozita e bashkuar më kërkoi që t’i drejtohem Venecias dhe unë e mora parasysh këtë kërkesë, pasi kjo opozitë më parë mori parasysh sugjerimin tim për të mos vënë si kusht qeverinë teknike, për të nënshkruar marrëveshjen e 5 qershorit”, tha Meta.
Ai tha se shpreson që të ketë një reflektim nga Kryeministri Edi Rama, ndërsa paralajmëroi se do të kërkonte mbështetjen e popullit shqiptar për të garantuar të ardhmen europiane të vendit.
Rruga e zgjedhur nga Meta duke iu drejtuar Venecias është mbështetur nga eurodeputetë dhe Komisioneri për Zgjerimin, Oliver Varhelyi, të cilët i kërkuan Ramës të mos nxitohet me rivotimin e Kodit dhe të presë opinionin e Komisionit. Por duket se Rama dhe deputetët e Rilindjes janë të vendosur që të miratojnë në seancën e së enjtes rrëzimin e dekretit.
